不少朋友都問過我網上創業點做好，賣什麼好，以下是我的小小個人經歷，總結了過去 8 年的經過。我開過網店、做過策略聯盟 (affiliate marketing)、做過 PPV，亦賣過課程。
希望各位可以花一點點時間閱讀，其實重點往往不是你賣什麼……
「……就好似你原本打算游去一個美麗的小島，但你發覺越游越攰，而你根本睇唔到離小島究竟有幾遠，隻腳開始抽抽地……你會選擇回頭? 還是繼續游?」
望一望床頭個鐘，不經不覺已經凌晨 4 點，燈已經熄晒，我眼光光訓喺自己張床度，不知不覺地望住個霉霉地的天花板望左成3個幾鐘…..
夜闌人靜既晚上，間唔中聽到晨運老人家的細語，屋企人已經瞓晒，我喺度諗點樣可以賺到錢……但似乎呢個問題未解決到，我都難以入睡……
再諗諗而家自己既財務狀況，真係愁上加愁……
我真正體會到就黎破產個種恐懼…….存款一早清晒，可look既信用卡都look爆晒，基本上可用既錢已經用晒……
但…..我唔敢同阿媽講﹕「我衰左了……」
故事的起源要數到2000年，我跟一般的中學生冇乜分別，每日番學打波打機，我不知道自己的人生目標，但我知道我更想做一個有用的人，要揾更多的錢!
我沒有什麼大夢想，只是可以等阿媽生活可以過得舒服一點，有錢請下佢去旅行…..當然自己都會想有閒錢去下旅行
果陣我得16-7歲住公屋，讀書成績都算唔錯既，好明確地知道自己唔太鐘意讀書，但我知唔讀書就要即時出黎做野; 為左唔咁早出黎做野，我唯有拼命都要上到中六七，但內心對「錢」既興趣其實遠大於讀書學習。
那年<<富爸爸 窮爸爸>>哩本書風靡全球大小書店，你問返我當時讀 7本<<富爸爸>>系列多定A-LEVEL多，我都唔知點答你。最後好好彩咁勉強入到大學，但讀果科都幾肯定唔會係自己將來要行既路。
睇完呢本書覺得呢個世界充滿希望，我要跟住哩本書去做: 就是建立資產，擁有被動收入，只要跟著做，財務自由應該不遠矣。其實我當時真心以為以上目標好易做到，結果事與願違!
我一路以為大學生會易揾錢好多，直至有一日做兼職時發覺旁邊年紀跟我多不多的銷售員月入竟然有 30,000，而當時的大學畢業生平均收入只得 12,000 元 (今日2017年，人工其實冇上升過，但購買力下跌了很多)…..
過左咁多年,我仲好記得第一日番工喺深水埗賣手提電話，就係企喺鴨寮街某一間好殘好霉既電話舖，有一刻真係好驚撞到熟人，尤其係朋友，如果真係撞到，我諗我真係會不顧一切咁調頭走。
你話我仲點會連主動走去搵客人問佢地: 「想要D咩丫，有咩可以幫到你?」
但奈何唔做就俾老闆捽，再無生意返就俾人小; 如果我問你俾人小定俾客仔拒絕，你會揀咩?
於是我就硬著頭皮獻出我既第一次=主動出擊去sell客。對住D手機資料，一見到客行埋黎起勢咁對住佢地讀，好似念波野波羅密心經咁幫佢地超渡，講到自己都唔知自己講乜。亦可能因為念經念得多，拜得神多自得神庇佑既緣故，最終果日俾我賣到兩部手機咁大把。
我心內有好多疑問﹕
「讀大學黎做乜?」
「退學是否更好呢?」
最後我安份守紀完成學業，也沒有太多的行動去諗發達諗點揾錢了。畢業後，我都係穩打穩紮咁搵份工，傻傻更更咁去左電訊公司做客戶經理，其實咪又係做銷售員，只不過今次著西裝，好似威d咁囉。
一做就做左3年，由雄心壯志搵快錢做生意，點知越做越唔對路，錢又揾得唔多，做既野好似copy & paste咁千篇一律，越做越Hea，做到無晒鬥志。這個感覺我相信好多人都會有，你知道你應該可以做到更多，但現實似乎限制了你的發展。
正當我好徬徨唔知點算既之際，可能真係命運既安排，一日返工HEA 既時候行過一間書局，俾我見到一本叫作<<一周工作4小時，晉身新富貴族>>書。
淨係睇個書名: 一星期返4個鐘可以富貴，都已經吸引我所有既注意力，我即刻攞起本書睇成個幾鐘，越睇越興奮，睇到連返公司打卡都差d唔記得，最後當然買埋返屋企慢慢睇喇。
但其實最影響我的一件事……
2008年雷曼事件
我其實冇錢買債券，雷曼事件一爆，全間公司人心惶惶，因為裁源的消息公佈了……
我呢種小薯當然不是被裁的目標，但眼見資歷有番咁上下的上司、上上司情況，我體會到好多野都唔係可以自己控制，就算你好有經驗，就算你有幾叻……
那種無力感不能用言語表達!
我在想，命運不在自己手上的感覺極之差，那種不安感令人窒息，我覺得我應該想方法避免以上情況發生。
由於呢件事令我知道要保障自己的方法，是時候開始自己的生意了。
其實我對做生意一d概念都無，漸漸地明白大部份傳統生意的起步都需要資金，像我哩種月光族 (其實我唔算大洗) 根本無可能係短期內集到足夠資金去創業。
無錢創業，唯有試下學下d大學同學仔買下股票。一買一賣即日鮮玩左一陣，本身對數字又唔係特別敏感既我發覺自己真係投入唔到; 我又無太多心機去研究d投票新聞，又唔太鍾意好被動咁等d股票慢慢咁升，可操控既地方著實太少，所以我玩左無耐連股票account都停埋~
值得慶幸既係我無損手爛腳咁離場，但講到尾佢幫唔到我原先想搵既創業資本。
由於投資又唔掂，打工又唔掂，只好不停揾出路……
當時網路創業仲係好新，極其量只可以講我識Yahoo拍賣，ebay咁多，但就是一本書改變了我之後的人生…..
其實本書係講有關於Online Marketing既，當時既我對哩樣野可以話係零知識，喺睇哩本書之前真係完全無諗過進入哩個行業，然而從書中唔單止令我了解多左哩個創新既行業，亦令我學會到一個新既概念如下:
除了錢以外，我還要時間!
之後，我不停繼續上網研究搵資料，我察覺到本書讀者群係美國人，所以有部份方法唔太適用於我。我花左好多精神同時間去研究，並發現喺美國上網揾錢的方法係多如繁星，而每個方法都好似好work好揾到錢。就係咁，我就跌跌盪盪咁開始走進哩條不歸路。
我以為自己的企業家之夢重燃，亦以為哩個世界為我而開…..
故事還未完…..
我試左好多唔同既方法: 試過請菲律賓人、印度人幫我工作，試過買好貴的Software，試過花3萬蚊join個Coaching，試過參加香港網絡創業課程，但全部都沒有我預期中賺得好多錢既效果。
但我無放棄，仲每月都同自己講﹕「下個月會開始賺錢，今個月只是交交學費姐，下個月……一定可以……」
我仲好記得第一單網上生意是成功賣出 Clickbank既一個產品，教人自製太陽能發電板。我用左足足兩日時間喺網上賣廣告，到最後真係竟然有人買。我以為做生意就係咁易，仲以為自己真係咁有實力，但其實一齊都只係錯覺…..(如果我當初哩單野無成功賣出，可能我一早就已經放棄左~)
結果原來負碌真係無三次，如果我當時仲傻下傻下日日喺度守株待兔以為生意真係會陸續又來，我估我都唔會可以喺度share哩篇文俾大家睇。
生意額根本唔可以用差黎形容，根本係零。
哩種生意失敗既感覺，我到左而家都仲好記得。d鬚根好似剃極都仲有，支出就日日都仲有。我真係好想搵窿捐，唔敢照鏡見到自己，唔敢面對屋企人，更加唔想見到朋友，直頭連街都唔想出。
去到果個moment，我真心想過放棄，雖然好唔甘心……
到左而家我都唔知自己點樣捱過果段日子，自信心跌至人生既谷底，不停不停懷疑自己，望住自己個頹樣。
我要擔心自己唔知要捱幾耐之餘，但又唔知點面對屋企人，又唔想令佢地擔心，唯有全日收埋自己喺房，等到屋企人訓晒先行出房門搵野食，個種感覺到左而家都仲記得。
至於點解唔想見到朋友，都離不開面皮唔夠厚怕俾朋友笑，眼見朋友順利，人工越來越高; 我就連飯錢都無，真心怕俾人恥笑。
當時真係祈禱又試過，佛牌又帶過，如果當時有人同我講可以「性交轉運」，我堅係會第一時間撲埋去試試，唔係講笑，你地唔會明白果陣有幾咁頹，應該沉左成兩三年。
之後我繼續死做難做，終於有少少起色，係「少少」，但都係唔太掂。
而喺哩段日子又俾我明白到哩行真係好奇怪，門檻好低，但要精通及成功又一d都唔易。
現在總算掌握了少少，睇我個BLOG就知我點解咁講。雖然好老土好唔型，但都係果句﹕辛勤工作
現在回想起，如果當時可以有人教一教扶一扶我，應該可以走少好多冤枉路，就算錯都唔會錯得太離譜。好可惜哩個世界沒有如果，我也不能省回那三年的時間。
我說出我的故事，不是因為我的故事有什麼特別，問題就在於我的故事並不特別。我跟你其實也差不多……每日都有人想追尋自己的夢想，我是其中一人…..
有兩點我想強調﹕
- Online生意同所有生意一樣，都不要期望立即有回報; 有一個心理準備可能負出左都未必有回報/負出同回報不成正比。
- 專注集中好重要。
現在的我需未達到財務自由，但向著目標走的感覺越來越好，實際工作時間越來越少，收入卻越來越多。現在擁有的已經比我當初所想多得多， Digital Agency ，網店，專欄，人力資源公司，一本網上雜誌，還有一點點的個人品牌……還有近呢一兩年多了很多自由時間
有時同朋友食飯，離不開工作的話題﹕
「個阿頭弱智架，係咪都x，人生點解要咁xx9」
「日日都要OT，收工已經8、9點，仲打咩波呀……有時間倒不如訓下覺好過」
當身邊朋友還在為工作及老闆苦惱時，有時會慶幸自己幾年前作的決定。我亦非常感恩。
其實香港也有不少網賺的機會，各位不妨參考一下以下文章 <<網賺是否真實存在>>
不能否認「幸運」在我的路上扮演了一個重要的角色。不知道大家有否睇過 Napoleon Hill的 <<思考致富>>，其中有一段是這樣的﹕
” 每一次失敗，每一次逆境都會帶一顆相同份量成功的種子，植在你的心中，終有一天會為你帶來更大的成功。彷彿有個隠型的指導者，但凡有人想成功或得到更多，給予人們種種的困境，若你能通過指導者的考驗，你便能得到更大更多的成功。”
當時，唯一支撐自己的就是上述不停的自我安慰。我不會預期之後的路會順風順水，但最少我相信我有能力跨過。
各位想建立你的網上生意，最好的方法就是揾一個已經成功的人模仿。(我不是叫你跟我學) 講真架，唔係吹水!
你會行少好多冤枉路。與此同時你亦可藉此打好基礎。
我深信每個人都可以做到，如果我都做到，你都唔好再依靠你的老闆，唔好再俾借口你自己，我深信基本上任何只要想學的人都有機會做到，只是你有沒有行動罷了。
現在我的目標是網賺月被動收入 10萬元，現在還在努力進行中。
想像一下，如果你得到財務自由、時間自由，你會做什麼呢?
有人會選擇環遊世界，有人會享受跟家人一起相處更長的時間，但比起享樂我就更想為社會貢獻更多!
剛巧做埋哩個星期就啱啱好兩年，幫左陳校長做免費補習的義師，哩一種滿足感對我黎講比起賺到錢更有意義更為快樂!
以前，基本上所有做的事情都是為自己，現在開始會多諗一些自己做的能否影響到人，我想這是近年的體會!
以上是我少少的分享，好希望啟發到大家去追夢，爭取原本大家應該有的自由。
有時收到人問我點樣做到，我都好難一言一語解釋，好幾年前我睇到一篇文章 <<真希望我一開始就懂的事-74堂im課>>，對我有好大啟發，有時間不妨一讀!
各位好，我係Ringo，做左網賺超過6年，依家有一間Digital Agency專門幫人做 SEO及建立自動化銷售漏斗。
今日唔係叫你買野…..而係想向你推薦一本你一定要睇的書 (本書仲要免費)
呢本書會教你點樣一步一步建立你的網上生意……
如果你已經試過好多創業方法都揾唔到錢，又苦無其他方法……
你要睇下呢本書……..因為……
富爸爸作者 Robert Kiyosaki 及激勵大師 Tony Robbins 都係用書教的系統設計他們的網上生意……
如果各位有興趣的話，可以到以下網頁了解﹕
我有什麼陰謀嗎?
暫時未有，或者我想你對你信任更加多一點……
之後我可以賣更貴的產品給你……
如果你想有一盆額外收入的生意，又唔知如何埋手的話，你應該最少了解一下……
曾經睇過一項統計﹕
老了，一生最後悔什麼？全球統計前五名
第一名：92%的人後悔年輕時努力不夠導致一事無成
第二名：73%的人後悔在年輕的時候選錯了職業
第三名：62%的人後悔對子女教育不當
第四名：57%的人後悔沒有好好珍惜自己的伴侶
第五名：45%的人後悔沒有善待自己的身體……….如果各位曾經試過為自己事業努力但未成功，唔好放棄，繼續試……
我不能說自己成功，但叫做一步步向前邁進…….
